រឿង​ ក្អែក​ និង ខ្វែក​សត្រូវ​និង​គ្នា​

មាន ​សេចក្ដី​និទាន​ថា​ កាល​ពី​ព្រេង​នាយ​ សត្វ​បក្សី​ទាំង​អស់​ សុទ្ធ​តែ​មាន​សម្បុរ​ស​ដូច ៗ គ្នា​ ខុស​តែ​រាង​រៅ​ និង​សណ្ឋាន​ទ្រង់​ទ្រាយ​ប៉ុណ្ណោះ​។ ពេល​ដែល​ហើរ​លើ​អាកាស​ គេ​មិន​អាច​សំគាល់​បាន​ថា​ជា​សត្វ​អ្វី​ ៗ ឡើយ​។ ដោយ​មាន​សភាព​ច្រឡំ​គ្នា​ដូច្នេះ​ ទើប​សត្វ​ទាំង​អស់​ បាន​បបួល​គ្នា​មក​ប្រជុំ​ព្រឹក្សា​គ្នា​ថា​ ” ឥឡូវ​នេះ​ យើង​ទាំង​អស់​គ្នា​គិត​រចនា​រូប​យើង​ទាំង​អស់​គ្នា​ អោយ​មាន​សភាព​យ៉ាង​ណា​ ដើម្បី​ឲ្យ​មាន​ពណ៌​សម្បុរ​ខុស ៗ គ្នា​ ប្រយោជន៍​កុំ​អោយ​មនុស្ស​លោក​គេ​ច្រឡំ​ ។ លុះ​ជំនុំ​អស់​ពេល​យ៉ាង​យូរ​ទើប​សម្រេច​ថា​ ” អ្នក​ណា​ស្រឡាញ់​ពណ៌​សម្បុរ​យ៉ាង​ណា​ ចូរ​ធ្វើ​យ៉ាង​នោះ​ទៅ​ចុះ​ កុំ​អោយ​តែ​ដូច​គ្នា​ ” ពេល​នោះ​ សត្វ​ទាំង​អស់​បាន​អនុម័ត​យល់​ព្រម​តាំង​សត្វ​ខ្វែក​ អោយ​ធ្វើ​ជា​មេ​ខាង​គំនូរ​ ខ្វែក​បាន​គូរ​គ្រប់​សត្វ​ទាំង​អស់​ តាម​របៀប​ដែល​គេ​ចូល​ចិត្ត​រៀង​ៗ​ខ្លួន​ នៅ​សល់​តែ​ក្អែក​ និង​ខ្វែក​ខ្លួន​ឯង​ ពុំ​ទាន់​បាន​គូរ​នៅ​ឡើយ​ ។ ខ្វែក​សួរ​ទៅ​ក្អែក​ថា​ ” បង​ក្អែក​ឯង​ចង់​គូរ​ពណ៌​ដូចម្ដេច​ ? ” ។ ក្អែក​ឆ្លើយ​ថា​ ” ស្រេច​នៅ​លើ​បង​ខ្វែក​ បង​ដែល​ជា​ជាង​គំនូរ​ស្រាប់​ គូរ​យ៉ាង​ណា​អោយ​តែ​សម​ល្អ​ ” ។ ខ្វែក​ឆ្លើយ​ថា​ ” អើ​ ! បើ​ដូច្នោះ​ខ្ញុំ​គូរ​បាន​តែ​ពេល​យប់​ទេ​ ទើប​រំលេច​ពណ៌​ល្អ​​​​ គូរ​ថ្ងៃ​មិន​ល្អ​ទេ​ ។​​ ប៉ុន្តែ​ចូរ​ក្អែក​ឯង​ គូរ​ឲ្យ​ខ្ញុំ​មុន​សិន​ ចាំ​ខ្ញុំ​គូរ​ឲ្យ​បង​ឯង​ក្រោយ​ ក្អែក​ក៏​គូរ​អោយ​ខ្វែក​មាន​ពណ៌​ក្រវេមក្រវាម​តាម​ពេញ​ចិត្ត​ ។ លុះ​ដល់​ពេល​យប់​ងងឹត​សូន្យ​សុង​ខ្វែក​ក៏​ហៅ​ក្អែក​ទាំង​អស់​មក​ប្រជុំ​ ព្រឹក្សា​​គ្នា​ហើយ​លាយ​ធ្យូង​មួយ​ខ្ទះ​ធំ​យក​កំណាត់​ជ្រលក់​លាប ៗ ពេញ​សត្វ​ទាំង​អស់​ គ្មាន​សល់​សាច់​ត្រង់​ណា​បន្តិច​បន្តួច​ឡើយ​ ។ លុះ​ព្រឹក​ឡើង​កាល​ណា​ក្អែក​ទាំង​អស់​ឃើញ​ខ្លួន​ខ្មៅ​ព្រីក​គ្រប់​ៗ គ្នា​ឯ​ខ្វែក​គ្រាន់​តែ​ភ្លឺ​ព្រាង​ ៗ ក៏​នាំ​គ្នា​ហើរ​គេច​ខ្លួន​បាត់​អស់​ ។ ក្អែក​នឹក​ខឹង​ណាស់​ នាំ​គ្នា​ហើរ​ស្រែក​កង​រំពង​ពាស​ពេញ​ព្រៃ​ រក​ខ្វែក​ អោយ​តែ​ជួប​ប្រទះ​នឹង​ចឹក​សំ លាប់​អោយ​វិនាស​ ។ ហេតុ​នោះ​ហើយ​ ទើប​សត្វ​​ខ្វែក​រក​ស៊ី​តែ​ពេល​យប់​ ព្រោះ​បើ​​រក​ស៊ី​នៅ​ពេល​​​​​​ថ្ងៃ​នោះ​មុខ​ជា​ពើប​ប្រទះ​នឹង​សត្វ​ក្អែក​ ដែល​ជា​សត្រូវ​យក​ជីវិត​របស់​វា ក្អែក​នឹង​ព្រួត​គ្នា​ចឹក​សំ លាប់​ចោល​មិន​ខាន​។ លុះ​ដល់​ពេល​ថ្ងៃ​ វា​នាំ​គ្នា​សំងំ​នៅ​ក្នុង​​ព្រៃ​បាត់​អស់​ រហូត​មក​ដល់​សព្វ​ថ្ងៃ​នេះ ៕

_______________________
ប្រជុំ​រឿង​ព្រេង​ខ្មែរ​ភាគ​ទី​៧

Download Khmer UnicodeDownload Khmer Unicode
Khmer Quotes